Nanu ya ing Espiritismo?

Ing Espiritismo mangabaldugan yang metung a escuela na ning bie. Menibat ya king aduang amanu: "spiro" o pangisnawa, espiritu o bie, at "ism" o konseptu, teoria, pamagaral o escuela.

Ing salitang Espiritismo minuna yang migamit queng libru nang Allan Kardec (Hippolyte Leon Denizard Rivail) a "El Libro de los Espiritus."
 

El Libro de los Espiritus

Ginamit ne ing amanung Espiritismo bang ayaliwa ne queng amanung Espiritualismo na gagamitan da na reng aliwang maniwala quing bie kaibat na ning kamatayan.

Ing Espiritismo metung yang malawak larangan na ning kamalayan, metung yang escuela ning pamanisip queng kabilugan na ning bie kapamilatan na ning ciencia, filosofía, ampon religión. 

Metung yang ciencia uling paintunan na, manaliksik ya at didinan na lang klasipikasyon deng katutuan at manipestayon a menibat queng espiritual a kabilian na ning bie.

Metung yang filosofía uling pagaralan na la reng ley na ning naturalesa kareng kalupang tau, mayayakit ya man o ali.

Metung yang religión uling pakiintindian na ing pamikisanmetung ding sablang tau at bague a lelangan na ning Dios.

Atin yang pamialiwa ing Espiritismo queng Unión Espiritista Cristiana de Filipinas, Incorporada (UECFI)?

Atin, maragul la pamialiwa. Ing Espiritismo malaganap yang pamagaral queng bie a makabate qing ciencia, filosofía ampon religión. 

Ing UECFI metung yang aguman a mitatag aniang 19 ning Febrero, 1905 dapot opisyal ya pang me-registru queng gobiernu anyang 23 ning Enero, 1909.

UECFI Logo

Ing lema na ning UECFI yapin ing "Hacia Dios por la Ciencia y el Amor" o Papunta quing Dios kapamilatan na ning Kabiasnan ampon Lugud. Kayabe ne niti ing doctrinang "Sin Caridad no hay Salvación Posible" o Nung alang dapat a mayap alang kaligtasan. Anti naman ing amanung "Guerra la Ignorancia y el Fanatismo" o Labanan ing Kamangmangan at Kapanatismuan.